1Jo 4 | PMA | STEP | Onak eli keil, kosa, provet taliluvosien keil houlu uva en out vasi. Sakini, minakul anatin entei selusien onen meatin vasi koa avit akur Ninin Votut. Ka mihesak vis keil keke mivahotini keke ninin koa mul en keil ka ven Ahi anatin.

1 John 4

Mukave Rovalei Kilea Ninin Koa vi Anatin ka Koa vi Taliluvosien

1 Onak eli keil, kosa, provet taliluvosien keil houlu uva en out vasi. Sakini, minakul anatin entei selusien onen meatin vasi koa avit akur Ninin Votut. Ka mihesak vis keil keke mivahotini keke ninin koa mul en keil ka ven Ahi anatin. 2 En sakien koanik miheilea keke vi Ninin onen Ahi koa mul en keil: meatin koa vit lati keke Iesu Kristo mai vi meatin koa aven mul, kei kur Ninin Votut koa ka ven Ahi. 3 Ka meatin koa sesein anatinien koanik usil Iesu, kei rokurtei Ninin Votut koa ka ven Ahi. Ninin koa mul ien ka ven koakeil avi vativieh ral min Iesu Kristo. Mulamu, milonge keke ninin koanik hemai, ka kosa, mul tuai en out netan.

4 Ka onak eli keil, kami mivi onen Ahi, ka mimulin provet keil taliluvosien tuai veni misesein hihisein keil one. Mimulin keil veni Ninin Votut koa mul en kami keih imok mulin ninin onen Temat koa mul en koakeil ten out netan. 5 Provet keil taliluvosien enek avi ten out netan ka amul aselus usil tounah keiles ten out netan. Sakini, koakeil ten out netan amul araengon selusien one. 6 Ka ir, rovi onen Ahi. Sakini, koakeil akilea Ahi, amul araengon hihiseien orer. Ka koakeil araengontei, keil arvitei onen Ahi. En sakien enek, rokilea rovalei kilea isei kur Ninin ten anatinien ka isei kur ninin taliluvosien.

Envatien Hel en Koakeil Amusil Kat Ahi Ten Envatien

7 Onak eli keil, erhehat tuer keil, veni envatien ka ven Ahi. Meatin koa envatien mul ien mul rie lati keke Ahi sakini vi heite hau vi titan kati koa kilea eni. 8 Meatin koa enrovattei meatin sav keil rokileatei Ahi, ven Ahi vi vatte ten envatien. 9 Ka Ahi rie lat envatien onen minir navong san natnali koa tas mita en out netan keke rokilea rovakur moulien koa ten lisenges ka en kei. 10 Vatte ten envatien rovitei sakien koa ir rorie lati va min Ahi. Vuo, vatte ten envatien koa mal revi vi asa koa Ahi rie lati minir navong san Natnali keke hekur mahien keil orer ka hemat hesuval sanien votut keke vahinat tisaen keil orer. 11 Onak eli keil, veni Ahi envatir en sakien enek, ir emun er hehat tuer keil. 12 Meatin tovuol veah vales Ahi kati. Ka munak ir Kristin keil er hehat ir, Ahi ro neim en ir ka envatien onen mul mumon umen vasi keil onen ka en moulien orer.

13 ?Ir reheilea keke rokapil ral min Ahi ka kei kapil ral minir hemukave? Rokilea eni navong rolei kilea keke Ninin Vout koa sani min meatin keil onen mul en ir. 14 Ahi Tata san Natnali mai voutut meatin keil ten out netan. Ka komai, eiloheh keil, meles Iesu koa mevitehiteni keke asa koa mumoni min meatin keil keke vi anatin. 15 Munak ir rovit lati keke Iesu vi Natin Ahi, rokapil ral min Ahi ka kei mun kapil ral minir. 16 Sakini, rokilea envatien onen mul enir ka romundesini keke Ahi heles hetie lat envatien onen enir en avong vasi.

Ahi vi vatte ten envatien, ka koakeil envatien mul en keil, amul akapil ral min Ahi ka Ahi mul kapil ral min keil. 17 Ka navong envatien onen mum vasi umen onen en moulien orer, rokilea rovahati ir keke rehermetautei en meten Ahi en Avong ten Hakot. Anatin, metauen hetovuol en ir veni moulien orer mul rie lat sakien ten envatien suval Iesu. 18 Metauen hetovuol en koakeil envatien onen Ahi mul en keil. Anatin, veni envatien koa mum vasin umen onen mul likat rasil lin metauen vasi keil ran ir. Sakini, koakeil ametaun mahien ten hakot, envatien onen Ahi rorokoltei veah keite ten umen onen en moulien one.

19 Ir rokilea ervahat Ahi ka ervahat meatin sav keil, veni, mulamu, Ahi envatir. 20 Munak roviteni rovit ervat Ahi, ka tiner kat tuer vuo ahiner tai, ir rovi meatin keil taliluvosien. ?Veni navong errovattei tuer keil ka ahiner keil koa romul roles keil en meter, hemukave suk erhehat Ahi koa rorlestei? 21 Erhehat meatin sav keil veni Ahi san mengkatien enek minir: meatin koa envatien onen mul en Ahi, kei enhehat tunali ka tunahin sav keil emun.